Foar jo leit de earste begrutting fan dizze riedsperioade.
Wy presintearje jo in slutende begrutting foar 2027. Dit is it resultaat fan soarchfâldich finansjeel belied yn kombinaasje mei in bliuwende ynset om ús mienskiplike opjeften te realisearjen. Sa kinne wy ek de kommende jierren op folhâldbere wize ynvestearjen bliuwe yn in leefbere, sosjale gemeente foar ynwenners, ûndernimmers en oare organisaasjes. Dit binnen de finansjele romte, troch skerp te begrutsjen en sûnder lesten troch te skowen nei kommende generaasjes.
Tagelyk sjogge wy mei soarch nei de jierren nei 2027. De mearjierrenraming is net posityf. Lykas earder ek by de kadernota oanjûn, is der beheinde finansjele romte beskikber foar nije plannen en winsken. Fan foldwaande strukturele jilden fan de ryksoerheid is noch gjin sprake en ekstra ryksheffingen soarchje der ek foar dat de lesten fan ús ynwenners tanimme. De feriening fan Nederlânske gemeenten docht dan ek alle war om bynammen te lobbyen foar foldwaande jilden yn it gemeentefûns.
As gemeente steane wy foar wichtige strategyske karren. De fraach is net allinnich hoe’t wy komme ta finansjeel lykwicht, mar foaral ek hoe’t wy dat dogge op in wize dy’t rjocht docht oan ús ambysjes en de ferwachtingen fan ús ynwenners. Hokker taken en foarsjenningen fine wy fan bliuwende wearde? Wêr kinne wy skerper begrutsje of effisjinter wurkje? Binne der taken dy’t de mienskip graach foar har rekken nimt?
De kommende perioade sille wy oer boppesteande petearen fiere mei jo as ried, ús ynwenners en oare partners. Dêrby sille wy yn folle iepenheid oparbeidzje. Want just yn ûnwisse tiden is it fan belang om koersfêst te bliuwen en mei-inoar rjochting te jaan oan de takomst fan Tytsjerksteradiel.
Dizze begrutting foarmet dêrmei net allinnich in finansjeel dokumint, mar ek in útnûging om mei alle partijen yn de gemeente foarút te sjen. Mei betrouwen yn de krêft fan de mienskip en ús organisaasje én it lef om karren te meitsjen, bouwe wy oan in bloeiend en takomstbestindich Tytsjerksteradiel.
It kolleezje, Burgum 5 novimber 2026